Waziri wa Nishati, Dkt Medard Kalemani ameeleza kuridhishwa kwake na uzalishaji wa nyaya za umeme unaofanyika katika kiwanda cha Everwell Cable & Engineering kilichopo mkoani Pwani ambacho kina uwezo wa kuzalisha nyaya za urefu wa kilometa 24,000 kwa mwaka.

Waziri wa Nishati, Dkt Medard Kalemani (wa Tano kushoto) akizungumza na watendaji wa TANESCO mara baada ya kukagua ujenzi wa kituo cha kupoza umeme cha Dege wilayani Kigamboni.

Alieleza hayo akiwa katika ziara ya kikazi mkoani Pwani na Dar es Salaam ambapo alikagua uzalishaji wa nyaya katika kiwanda hicho pamoja ujenzi wa vituo vya kupoza umeme vya Dege na Kurasini.

“ Kwa sasa kuna viwanda vitano vinavyozalisha nyaya za kutosha na za ukubwa mbalimbali hivyo bado nasisitiza agizo la Serikali la kutonunua nje ya nchi vifaa vya umeme vinavyopatikana hapa nchini,” alisema Dkt Kalemani.

Aidha, Dkt Kalemani alisema kuwa, Serikali haitawavumilia wakandarasi au wataalam wanaochelewesha utekelezaji wa miradi ya umeme kwa kisingizio cha kutokuwa na vifaa wakati vinapatikana kwa wingi na gharama nafuu ukilinganisha na vifaa kutoka nje ya nchi.

Akiwa katika kituo cha kupoza umeme cha Dege wilayani Kigamboni, alieleza kuridhishwa na hatua za ujenzi zilizofikiwa hadi sasa lakini alitoa agizo kwa watendaji wa Shirika la Umeme Tanzania (TANESCO) kuhakikisha kuwa ujenzi wa kituo hicho unakamilika ifikapo Februari mwaka 2019 badala ya Oktoba, mwakani.

Alisema kuwa kituo hicho kitafungwa mashine zenye uwezo wa megawati 200 lakini itaanza kufungwa mashine moja yenye uwezo wa megawati 50 itakayohudumia eneo la Kigamboni ambalo mahitaji yake ya umeme ni chini ya megawati 25.

Vilevile, Dkt Kalemani alikagua ujenzi wa kituo cha kupoza umeme cha Kurasini na kupongeza TANESCO kwa kukamilisha ujenzi wa Kituo hicho ambacho kimefungwa mashine yenye uwezo wa megawati 40 itakayoimarisha upatikanaji wa umeme katika maeneo ya Kurasini na Kigamboni.

Dkt. Kalemani alisema kuwa, mradi huo ulioanza kutekelezwa mwaka 2009, ulikuwa ukisuasua kutokana na wakandarasi kutotekeleza majukumu yao kwa ufanisi na kwa sasa kuna mwananchi mmoja amekataa kupisha moja ya eneo inakopita miundombinu ya umeme kwa kukataa fidia ya milioni 800.

Waziri wa Nishati, Dkt Medard Kalemani (katikati) akiwa katika kiwanda kinachozalisha nyaya za umeme cha Everwell cable kilichopo Mkuranga mkoani Pwani. Wengine katika picha ni viongozi wa kiwanda hicho pamoja na watendaji wa Wizara ya Nishati, TANESCO na REA.

Kuhusu suala hilo la fidia, Dkt Kalemani aliwaagiza watendaji wa TANESCO kufanya mazungumzo na mwananchi huyo kwani atalipwa fedha hizo kwa mujibu wa viwango vya Serikali  na ndani ya miezi miwili kituo hicho kianze kufanya kazi.

Na Teresia Mhagama